Amasomo n’inyigisho yo ku Cyumweru cya XXIV Gisanzwe — Umwaka A

Abatagatifu: Yohani Krizostome, Gido, Ame, Ewuloji, Lidwari, Mawurili.

---

ABA YEZU BIRINDA INZIKA N’UMUJINYA KUKO BITEYE ISHOZI
1. ISOMO RYA MBERE

Isomo ryo mu gitabo cya Mwene Siraki

Sir 27,30; 28,1-7

Inzika n’umujinya ni ibintu biteye ishozi, kandi umunyabyaha aba yarabizobereyemo.

Uwihorera ku bandi, Uhoraho na we azamwihoreraho kuko ibyaha byose abibara yitonze.

Jya ubabarira mugenzi wawe ibicumuro bye, bityo nusenga n’ibyaha byawe bizahanagurwa.

Umuntu urakarira undi akaritsira, yasaba ate Uhoraho ngo amurokore?

Yaba atababarira mugenzi we, kandi agatakambira Uhoraho kubera ibyaha bye!

We ubwe ko agira inzika kandi ari umubiri ashoreye, ni nde wamubabarira ibyaha bye?

Jya wibuka amaherezo ya byose maze ureke kwangana; ubwo ugenewe kuzapfa no kubora, ubahiriza amategeko.

Jya wibuka amategeko woye kugirira inzika mugenzi wawe, wibuke isezerano ry’Umusumbabyose wange ubuhemu.

Iryo ni Ijambo ry’Imana.

---

2. ZABURI

Zab 103(102), 1-2, 3-4, 9-10, 11-12

Inyikirizo: Uhoraho ni umunyambabazi n’umunyampuhwe.

Mutima wanjye singiza Uhoraho,
n’icyo ndi cyo cyose gisingize izina rye ritagatifu!

Mutima wanjye singiza Uhoraho,
kandi ntiwibagirwe na kimwe mu byo yaguhaye!

We ubabarira ibicumuro byawe byose,
akakuvura indwara zawe zose;
we warura ubugingo bwawe mu mva,
akagutamiriza ubutoneshwe n’impuhwe.

Ntatongana ngo bishyire kera,
ntarwara inzika ubuziraherezo,
ntaduhana bihwanye n’ibicumuro byacu,
ntatwihimura akurikije amafuti yacu.

Uko ijuru ryisumbuye kure hejuru y’isi,
ni ko impuhwe ze zisagiranira abamutinya;

uko uburasirazuba butandukanye n’uburengerazuba,
ni ko adutandukanya n’ibicumuro byacu.

---

3. ISOMO RYA KABIRI

Isomo ryo mu Ibaruwa Mutagatifu Pawulo Intumwa yandikiye Abanyaroma

Rom 14,7-9

Bavandimwe, koko rero nta n’umwe muri twe ubereyeho we ubwe, kandi nta n’umwe upfira we ubwe.

Niba turiho tubereyeho Nyagasani; niba kandi dupfuye dupfira Nyagasani. Twabaho, twapfa, turi aba Nyagasani.

Koko rero ni cyo cyatumye Kristu apfa akazuka, kwari ukugira ngo abe ari we ugenga abapfuye n’abazima.

Iryo ni Ijambo ry’Imana.

---

4. IBANGO-NDIRIMBO RIBANZIRIZA IVANJILI

Yh 13,34

Alleluya, Alleluya.

Nyagasani yadusigiye itegeko rishya, ati:
«Nimukundane, kandi mukundane nk’uko nabakunze.»

Alleluya.

---

5. IVANJILI NTAGATIFU

Amagambo yo mu Ivanjili Ntagatifu uko yanditswe na Mutagatifu Matayo

Mt 18,21-35

Muri icyo gihe, Petero yegera Yezu aramubaza ati:

«Nyagasani, uwo tuva inda imwe nancumuraho nzamubabarire kangahe? Nzageza ku ncuro ndwi?»

Yezu aramusubiza ati:

«Sinkubwiye kugeza kuri karindwi, ahubwo kuri mirongo irindwi karindwi.»

Nuko rero, Ingoma y’ijuru imeze nk’umwami washatse ko abagaragu be bamumurikira ibintu bye.

Atangiye kumurikisha, bamuzanira umwe wari umurimo amatalenta ibihumbi cumi. Uwo muntu abuze icyo yishyura, shebuja ategeka ko bamugura we n’umugore n’abana be n’ibye byose, bityo akaba yishyurye umwenda we.

Nuko umugaragu arapfukama, arunama avuga ati:

«Nyorohera nzakwishyura byose.»

Shebuja agize impuhwe, aramurekura kandi amurekera uwo mwenda we.

Uwo mugaragu akivaho, ahura n’umwe muri bagenzi be wari umurimo umwenda w’amadenari ijana, amufata mu muhogo aramuniga ati:

«Ishyura ibyo undimo byose.»

Nuko mugenzi we amupfukama imbere, aramwiginga ati:

«Nyorohera nzakwishyura.»

Ariko undi ntiyabyemera, ahubwo aragenda amuroha mu nzu y’imbohe kugeza igihe yishyuriye umwenda we.

Bagenzi be babibonye birabarakaza cyane; ni ko kujya kubwira shebuja ibyabaye byose.

Nuko shebuja aramutumiza, aramubwira ati:

«Wa mugaragu mubi we, nakurekeye umwenda wawe wose kuko unyinginze; wowe se ntiwagombaga kugirira mugenzi wawe impuhwe nk’uko nazikugiriye?»

Shebuja ararakara, amugabiza abamubabaza kugeza igihe yishyuriye umwenda we wose.

Yezu arangiza agira ati:

«Nguko uko Data wo mu ijuru azabagirira, nimutababarira bagenzi banyu mubikuye ku mutima.»

Iyo ni Ivanjili Ntagatifu.

---

6. INYIGISHO

6.1. Yezu Kristu aduhamagarira kubabarira

Yezu Kristu akuzwe!

Nyagasani Yezu Nyirimpuhwe wigisha abe kubabarira akabaha n’iyo ngabire, kugira ngo bazabane na We ubuziraherezo.

Nyagasani Yezu watsindiye abe urupfu akazuka ngo uko ariho na bo babeho.

Nyagasani Yezu utsindira inzika abamwizera akabakiza ubugome n’ubugambanyi, akabatsindira inzangano n’amacakubiri.

Nyagasani Yezu Bugingo bw’abamwizera aje adusanga kuri iki Cyumweru cya 24 gisanzwe mu mwaka wa Liturujiya A, kugira ngo akomeze atugire abana ba Se Uhoraho akoresheje ububasha bw’ijambo rye.

---

6.2. Inzika n’umujinya ni ibintu biteye ishozi

Mu isomo rya mbere, Nyagasani Yezu akoresheje Mwene Siraki uyu munsi, aratwereka ububi bw’inzika n’ukwihorera n’ubugome.

Ahamagarira buri wese muri twe gusohoka muri ubwo buroko Sekibi Sebugome yamufungiranyemo, cyangwa se niba yarabusohotsemo, kwirinda rwose kuba yabusubiramo, yasubira muri ubwo bucakara.

«Inzika n’umujinya ni ibintu biteye ishozi, kandi umunyabyaha aba yarabizobereyemo.»

Ayo ni amagambo yagombye gutuma dutekereza.

Ariko se, ubundi ibyo byagombye kuba ikibazo kuri twe abakristu?

Ko tuzi ko ubuzima bwacu ari ubwe We wadupfiriye akazuka nk’uko isomo rya kabiri ribivuga, kandi tukaba tuzi neza ko utababarira na we atazababarirwa, ni nde koko w’umukristu watinyuka guhembera inzika mu buzima bwe niba ashaka kuba uwa Kristu koko?

---

6.3. «Ntabyo nshoboye» — Yezu ni we utanga imbaraga

Wenda hari ukiri aho ngaho, cyangwa se uri mu kujyayo, cyangwa se ufite icyo gishuko muri iyi minsi, akaba ari mu